| §網 綠翠園 站§ Joy部落格 |
|---|
| 總 覽 | 版 務 | 政 經 | 健康醫療 | 軍 武 | 理 財 | 文 化 | 藝 文 | 科 技 | 台灣的美 | 旅 遊 | PISA | 娛 樂 | 鄉 土 | 公 民 | 認 同 | 副 刊 | 哈 啦 | 范氏網 |
| 竹縫 視界 | 耳聾 世界 | 泰伯 觀點 | Joy 隨筆 | 哈利 天地 | Jerry C 鳥 世 界 | 射水魚 天 空 | 討海人 鏡 頭 | 嘻笑 人間 | 詩情 畫藝 | 老工仔 思 維 | 網網 相連 | 歷史 庫存 |
| 主題：鬼（仔） |
|---|
| 發表：Joy | 2023-03-26 23:13:13 | 閱覽數：621 | (IP: ) | T 8045_R 0 | 引 用 |
|---|
|
講著鬼仔，tō想起細漢ê時kah阿母、阿姨仔做伙去看日本片【蛇女怪談】，足恐怖--ê, 所致我有一半以上ê時間攏khàm目睭咧看，彼日下暗我tō夢著我咧走hō͘鬼仔jiok，驚甲chhéⁿ-chhéⁿ起來m̄敢koh睏。 Chiâⁿ-si̍t講起來，我這世人猶m̄捌tú-tio̍h鬼仔！M̄-kú，我足驚家己ㄧ个人行暗路--ê, 我攏會想著鬼仔，愈想愈驚tō用走--ê, m̄管人按怎講，我tō是相信世間有鬼仔。 Éng-pái，我kan-taⁿ信斗「人咧衰，才會tú-tio̍h鬼！」鬼仔是bih佇暗暗ê所在ê魔神仔，八字輕才會去tú-tio̍h鬼仔，做歹代誌嘛會。我m̄捌害別人嘛m̄是八字輕，卻是到taⁿ想著鬼仔iáu驚甲phî-phî-chhoah, 莫怪今馬電影攏有分級，保護細漢gín-á袂使看鬼仔片ia̍h暴力片。 今仔日我才知影有一種人嘛叫做鬼仔（ghost），這種鬼仔是會曉寫故事ê人，有名聲ê作家聘請鬼仔來替in寫故事。作家想出下一本小說ê冊名，大約仔講出故事ê基本概念，ùi故事按怎發生kàu故事按怎發展、結束，tō攏是鬼仔愛想、愛做ê工課，約聘ê時間按合約來行而且過程完全保密，小說正式出版主僱關係tō自動結束。簡單來講，鬼仔領人ê薪水，食人ê頭路，寫ê故事也是別人--ê，m̄管這本小說有搶市無，攏無鬼仔ê代誌，tō親像從來無鬼仔這个人仝款（kâng-khoán）。 這个世間，有人有名聲，有人有能力，有名聲ê人無一定有能力，有能力ê人無一定有名聲，無名聲ê人：做人愛看人目色、做代誌愛靠有功夫。我ê感想是有名聲無能力khah贏得有能力無名聲，一个是好康做伊khîng、食好做輕可；一个是有做才有通hàu-ko͘、做鬼做到死嘛無定著有出脫！ 寫到遮，我koh想起，有當時仔咱會對人講：「彼（he）m̄是你家己咧講話，是tiâu佇你身上ê鬼仔咧講話。」意思tō是咧講：hit ê人若m̄是去hông嚇驚著（ heⁿh-kiaⁿ--tio̍h），tō是去hông洗腦--ah！ 鬼仔、鬼仔，m̄管看有ia̍h看無，古人有教示：「敬鬼神而遠之」，咱人m̄-thong做歹代害別人，也m̄-thong做人做到hông牽咧行，更加m̄-thong家己heⁿh-kiaⁿ家己無影當做有影，總是心頭掠hō͘在，透風落雨做伊來，免驚啦！ |
| 總 覽 | 版 務 | 政 經 | 健康醫療 | 軍 武 | 理 財 | 文 化 | 藝 文 | 科 技 | 台灣的美 | 旅 遊 | PISA | 娛 樂 | 鄉 土 | 公 民 | 認 同 | 副 刊 | 哈 啦 | 范氏網 |
| 竹縫 視界 | 耳聾 世界 | 泰伯 觀點 | Joy 隨筆 | 哈利 天地 | Jerry C 鳥 世 界 | 射水魚 天 空 | 討海人 鏡 頭 | 嘻笑 人間 | 詩情 畫藝 | 老工仔 思 維 | 網網 相連 | 歷史 庫存 |